Plantun de Prouvènço

Pèr coumpara dos planto d'encò nostre

Taraxacum obovatum & Ranunculus repens

Esquiho-pèd

Taraxacum obovatum

Asteraceae Compositae

Àutri noum : Pourcin, Peirin, Parpello-d'agasso, Douceto-de-lavando.

Nom en français : Pissenlit à feuilles obovales.

Descripcioun :
L'esquiho-pèd se vèi en rouseto l'autouno, pièi flouris d'ouro au printèms pèr plus se rescountra l'estiéu (soubro quàsi pu que la racino). Fai parti dóu group dis OBOVATA que porto de bano sus li bratèio e fai de gros akène (4 à 5 mm). Li fueio, en rouseto, soun lusènto (d'aqui que vèn bessai soun noum), quàsi óuvalo e souvènt entiero.

Usanço :
Es uno tras que bono ensalado champanello, mens amaro que soun cousin, lou pisso-chin. Coume éu, fai pissa e ajudo à la digestioun.

Port : Erbo
Taio : 5 à 20 cm
Fueio : basalo
Tipe bioulougico : Geoufite
Cicle bioulougico : Planto renadivo

Gènre : Taraxacum
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >5
Ø (o loungour) enflourejado : 2,5 cm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Remarco : Ensalado champanello
Abriéu à mai

Liò : Pinedo - Tepiero seco - Ermas - Escoumbre e proche dis oustau
Estànci : Mesoumediterran à Subremediterran
Couroulougi : Estenoumediterrano-Ouèst
Ref. sc. : Taraxacum obovatum (Waldst. & Kit. ex Willd.) DC., 1809

Crèbo-biòu

Ranunculus repens

Ranunculaceae

Àutri noum : Auriflam, Gros-boutoun-d'or.

Nom en français : Renoncule rampante.

Descripcioun :
Lou crèbo-biòu, uno meno de gros-boutoun-d'or (Var) trachis dins li relarg umide, èi pèr acò qu'èi pas toujour, au nostre, uno planto coumuno. Se recounèis à si fiéu (estouloun) que podon faire fin qu'à 2 mètre de long e que s'enracinon (fotò). Li sepalo rèston contro li petalo e lou fru èi lisc.

Usanço :
Coume tóuti li ranouncle, es uno planto empouisounanto, tambèn pèr li bèsti (crèbo-biòu). Pamens un cop seco o couito, l'anemonino caupudo èi trasfourmado e pu toussico. Se dis qu'èro manjado cuecho di tèms de carestié.